Kosmolohiya

Ang kosmolohiya, mula sa Ingles na cosmology, na hinango naman sa Griyegong cosmologia: κόσμος (cosmos, o kosmos) sanlibutan + λόγος (logos) (pag-aaral, salita, dahilan, plano) ay ang pag-aaral ng sanlibutan sa kaniyang kabuoan, at bilang pagpapalawak, ang kinalalagyan ng sangkatauhan sa loob nito. Isa itong pagaaral na tumatalakay sa pinagmulan, balangkas at mga likas na pangyayari sa sansinukob o uniberso. Bagaman kamakailan lamang ang salitang kosmolohiya (unang ginamit noong 1730 sa Cosmologia Generalis ni Christian Wolff), mayroon nang mahabang kasaysayan ang pag-aaral ng uniberso na kinabubukluran ng agham, pilosopiya, esoterisismo, at pananampalataya. Tinatawag na kosmologo o kosmolohista ang mga dalubhasa sa kosmolohiya.