may buhay na organismo

Ang organismo ay isang bagay na may buhay. Kabilang sa mga ito ang mga hayop at mga halaman. Ang mga organismo ay isang biyotiko, o buhay, na bahagi ng kapaligiran. Ang mga bato at sinag ng araw ay isang bahagi ng abiyotiko, o walang buhay, na kapaligiran. Mayroong limang payak na pangangailangan ang mga organismo: kabilang dito ang pangangailangan nila ng hangin, tubig, mga nutriyente (sustansiya o pagkain), enerhiya at isang lugar na matutuluyan. Ilan sa mga organismo ay binubuo ng milyun-milyong mga sihay (selula), kaya't tinatawag silang mga organismong multiselular. Ilan sa mga halimbawa nito ay ang mga aso, mga puno, at mga tao. Karamihan sa mga organismong multiselular (organismong may maramihang mga selula) ay maaaring makita na hindi kailangang gumamit ng mikroskopyo. Ilan sa mga organismo ay napakaliit kung kaya't hindi sila nakikita ng basta mga mata lamang. Kailangan ang paggamit ng mikroskopyo upang makita sila. Tinatawag ang mga ito bilang mga mikroorganismo. Ang mga organismo ay maaaring binubuo lamang ng iisang selula, na tinatawag namang mga organismong may isang selula o organismong uniselular. Ilang halimbawa ng mga ito ang bakterya, amoeba, at protosoa na katulad ng paremecium. Ang mga tao ay isang organismong binubuo ng maraming mga selula. Sa katunayan, ang katawan ng tao ay mayroong maraming trilyun-trilyong mga selula na ipinangkat upang maging natatangi o espesyal na mga tisyu at mga organo.